Uit die Hoof se Kantoor!

| Baie dankie aan al ons ouers wat die begrotingsvergadering bygewoon het. Ons waardeer julle betrokkenheid en ondersteuning in ’n tyd waar finansiële uitdagings die onderwyssektor raak. Ten spyte van die vermindering in die departementele subsidie, is ons dankbaar dat ons steeds in ‘n bevoorregte posisie is. Ons hoef die skoolfonds slegs met R100 per maand te verhoog – iets wat ons nie sonder julle lojaliteit en samewerking sou kon doen nie.

| Die matriekafskeid was beslis een van die hoogtepunte op ons jaarlikse kalender. ’n Groot dankie aan Martina Hamman en haar toegewyde span vir die puik beplanning en uitvoering van ’n pragtige, elegante funksie wat ons matrieks met trots kon afsluit.

| Baie geluk aan elke leerder wat tydens die prysuitdeling erkenning ontvang het. Julle harde werk, deursettingsvermoë en trots in Overvaal maak van ons skool die besondere plek wat dit is – dankie dat julle help bou aan Overvaal.

| ’n Spesiale woord van dank aan almal wat betrokke was by die reël van die matriekdiens – dit was ’n waardige en betekenisvolle geleentheid.

| Ons wens alle Graad 8–12-leerders sterkte toe met die eindeksamen. Mag julle goed voorberei en met selfvertroue elke vraestel aanpak. En aan ons matrieks van 2025 – Begin sterk, bly gefokus en maak elke geleentheid tel.